Олунньу ый 28 күнүгэр Чурапчы нэһилиэгэр «Айыллаан» култуура киинигэр биир бэлиэ күн буолла.

Олунньу ый 28 күнүгэр Чурапчы нэһилиэгэр «Айыллаан» култуура киинигэр биир бэлиэ күн буолла. Ахсынньы ый 6 күнүгэр 2023 сыллаахха онус уочарата суох нэһилиэк дьокутааттарын бэһис ыҥырыылаах сессиятын 59 нүөмэрдээх быһаарыытынан «Айыллаан» култуура киинигэр Иван Иванович Кандинскай аата иҥэриллибитин үөрүүлээх тэрээһинэ буолан ааста.

Иван Иванович Кандинскай 1969-73 сс Чурапчы народнай театрын төрүттээбитэ уонна режиссерунан үлэлээбитэ. Кини көҕулээһининэн тыйаатырга 1970 сылаахха биир дойдулаахпыт РСФСР уонна Саха АССР народнай артыыһа Петр Михайлович Решетников аата иҥэриллибитэ. 1973 сылтан үлэhиттэр депутаттарын Чурапчы оройуонунааҕы Советын культураҕа отделын сэбиэдиссэйинэн анаммыта. Иван Иванович Кандинскай үлэлиир кэмигэр Чурапчы култуурата сайдарыгар сүҥкэн кылааты киллэрбит туруу үлэһит киһи буолар. Ол курдук кини көҕүлээһининэн Дириҥҥэ народной театр, оҕо музыкальнай оскуолата аhыллыбыта.

Чурапчы остуоруйатыгар киирэр тэрээһин бэлиэ суругу Чурапчы нэһилиэгин баһылыга В.Д. Сивцев, Чурапчы нэһилиэгин депутаттарын сэбиэтин бэрэссэдээтэлэ В.В. Гуляев, Култуура киин директора С.В. Титова уонна ССРС культуратын туйгуна, Россия культуратын үтүөлээх үлэһитэ, РФ суруналыыстарын союһун чилиэнэ, Саха Республикатын Государственнай Мунньаҕын (Ил Түмэн) А.П.Илларионов аатынан Журналистскай бириэмийэтин лауреата, Чурапчы улууһун, Хайахсыт нэһилиэгин Бочуоттаах олохтооҕо М.А. Герасимова арыйыыларыттан саҕаланна. Нэһилиэкпит баһылыга Владимир Дмитриевич Сивцев кэлбит ыалдьыттарга эҕэрдэ тылын эттэ, «Айыллаан» култуура киинэ инники үлэтэ-хамнаһа, тэрийэр тэрээһиннэрэ өссө үрдүк таһаарыылаах буолалларыгар баҕаран туран дириэктэргэ Снежана Васильевна Титоваҕа, эҕэрдэ суругун кытта сертификат туттарда. 

Салгыы Иван Иванович Кандинскайга аналлаах «Дууһатын сылааһа-бар дьонугар» диэн ахтыы-кэнсиэрэ ыытылынна. Кэнсиэри ССРС култууратын туйгуна, Саха ААСР култууратын үтүөлээх үлэһитэ, Чурапчы улууһун уонна нэһилиэгин, бочуоттаах олохтооҕо, Чурапчы улууһун сайдыытыгар үтүөлэрин иһин бэлиэ толору кавалера, Саха Өрөспүүбүлүкэтин Бочуоттаах бэтэрээнэ Надежда Михайловна Заболоцкая иилээн-саҕалаан ыытта. Бу үөрүүлээх түгэҥҥэ Иван Иванович оҕолоро, сиэннэрэ, аймах-билэ дьоно, бииргэ үлээлээбит уонна алтыспыт култуура үлэһиттэрэ, бэтэрээннэрэ, доҕотторо-астастара Василий Дьячковскай, Мария уонна Валерий Герасимовтар, Дмитрий Попов, Петр Гуляев, Иван Бушков, Юрий Толстоухов, Тарас Тарасов, Аграфена Кузьмина, Семен Никитин, Алаҕар нэһилиэгин эр «Иэйии»  народнай хорун солистара ахтан санаан, кини сырдык аата «Айыллаан» култуура киинигэр иҥэриллибитэ оруннааҕын бэлиэтээн, махтал тылларын эттилэр. 

Бу киэһэ Иван Иванович Кандинскай оҕолоро уонна аймахтара «Айыллаан» култуура киинигэр анаан аҕаларын мэтириэтин бэлэх ууннулар. Дьоро киэһэни Иван Иванович салайар кэмигэр үлэлээбит, үлэҕэ үөрэппит махталлаах үөрэнээччилэрэ уонна билиҥҥи кэм Чурапчы улууһун уус-уран самодеятельноһын кыттыылаахтара уонна «Айыллаан» ыччаттара ырыанан –тойугунан киэргэттилэр.