https://vk.com/wall-211884885_516

Муус устар 24 күнүгэр Чурапчы нэһилиэгэр биллэриллибит “Чөл олох” сылын чэрчитинэн “Утум” норуот айымньытын дьиэтигэр "Аһыыр аһым - чэгиэн буолар төрдүм" аһаҕас кэпсэтии тэрээһинэ буолан ааста. Манна П.Н. Сокольников аатынан Чурапчытааҕы киин балыыһа профилактика кабинетын бырааһа Федианна Федоровна Атласова, дьиэ кэргэттэрин туһалаах аһынан хааччыйар, дьикти дьарыктаах хаһаайкаларбыт Екатерина Владимировна Константинова, Розалия Степановна Пономарева, Вероника Егоровна Маркова кэлэн ыалдьыттаатылар. 

Федианна Федоровна быраас идэлээх киһи буолан киһи доруобуйата аһыыр аһыттан быһаччы тутулуктааҕын туһунан кэпсээтэ, бэйэ иитэн таһаарбыт, үүннэрбит аһылыгын доруобуйаҕа буортута суоҕун бэлиэтээтэ. 

Екатерина Владимировна коза, кролик, индюк, куурусса иитэн дьиэ кэргэнин, оҕолорун сиэннэрин бэйэтэ оҥорон таһаарар продукциятынан аһатан элбэх иҥэмтэлээхбитэмииннэринэн хааччыйарын кэпсээтэ, көрөөччүлэри коза үүтүнэн, творогынан күндүлээтэ.

Розалия Степановна биһиги тымныы дойдубутугар оҕуруот аһын олордон өлгөм үүнүүнү ылары ситиһиэххэ сөптөөх сүбэлэри биэрдэ, оҕуруот аһын хайдах кэнсиэрбэлээн хаһаанарын кэпсээтэ, бэйэтэ кэнсиэрбэлээбит минньигэс салаатын, аджикатын амсатта уонна үлэлээн кэлэн баран сып курдук минньигэс доруобуйаҕа туһалаах салааты астыыры көрдөрдө.

Эдэр ийэ Вероника Егоровна биир туһунан дьикти дьарыктаах киһи, кини төрөөбүт дойдутун алаастарыгар үүнэр эмтээх оттору хомуйан иҥэмтэлээх чэй арааһын оҥорор, аска тума оҥостор. Бу дьикти дьарыгар кини баҕалаах дьону батыһыннара сылдьан от хомуйарга үөрэтэр үтүө үгэстээх эбит. Вероника ыалдьыттарга анаан дьэдьэн сэбирдэхтээх бирээнньик астаан, араас оттон оҥоһуллубут чэйин аҕалан амсатта.

Күнү көрөөччүлэр биһиги нэһилиэкпитигэр маннык сатабыллаах далбар хотуттар баалларын сэргээтилэр, сөхтүлэр. 

Бу тэрээһиҥҥэ ыҥырыыбытын быһа гыммакка кэлэн кыттыыны ылбыт нэһилиэкпит кэрэ аҥардарыгар барҕа махталбытын тиэрдэбит.

https://vk.com/video-211884885_456239181?access_key=93cfe43e90f1d21e90

Муус устар 26 күнүгэр Саха Республикатын күнүн көрсө И.И. Кандинскай аатынан «Айыллаан» култуура киинин иһинэн үлэлиир куруһуоктар «Утум» норуот уус-уран айымньытын дьиэтигэр «Аһаҕас аан күнүн» биллэрэн куруһуоктар үлэлэрин туһунан кэпсээтилэр, нэһилиэнньэҕэ анаан араас хайысханан уус-уран оҥоһуктарга маастар-кылаас ыыттылар. Ол курдук хосторунан арахсан куруһуок салайааччылара, уран тарбахтаах маастардарбыт таҥас быһыытыгар, сиэл-кыл оҥоһуктарга, кыбытыы тигиигэ, күрүчүөгүнэн баайыыга бэйэлэрин сатабылларын кэлбит ыалдьыттарга көрдөрдүлэр, үөрэттилэр.

 Саха Республикатын  норуот уус-уран оҥоһуктарын маастара, норуот художественнай культуратын магистыра, «Силик», «Дьэрэкээн» куруһуоктар салайааччылара Надежда Прокопьевна Ахматова таҥаһы быһыыга араас албастары, кэккэ сүбэлэри биэрэн иистэр дьон билиилэрин хаҥаттылар.

Саха Республикатын  норуот уус-уран оҥоһуктарын маастара, «Сиэл тойуга», «Умсулҕан» куруһуоктар салайааччылара Варвара Гаврильевна Бурнашева ыыппыт маастар-кылааһыгар  олохторугар маҥнайгытын күрүчүөгү туппут дьон сибэккини сатаан баайан сүргүлэрэ көтөҕүллэн куруһуокка сылдьыах буолан тарҕастылар.

Чурапчы нэһилиэгин норуотун маастара, «Кустугу куустарбыан», «Дьикти таас» куруһуоктар салайааччылара Слепцова Надежда Владимировна кыбытык тигии курдук күүстээх тулууру эрэйэр иис көрүҥэр 5 харахтаах харысхал тиктэрэн бэлэхтээтэ.

«Сиэдэрэй симэх» куруһуох салайааччыта, тимир ууһа Никифоров Олег Семенович штамповканан ытарҕа оҥоруутугар үөрэтэрин эр дьон эрэ буолбакка кэрэ аҥардар эмиэ сэҥээрэн көрдүлэр-иһиттилэр.

«Сиэл тойуга» куруһуокка дьарыктанар далбар хотуттарбыт Чурапчы улууһун норуотун маастара Максимова  Екатерина Гаврильевна, Чурапчы нэһилиэгин норуотун маастара Пудова Татьяна Петровна, Чурапчы нэһилиэгин норуотун маастара Коркина Елизавета Николаевна, Дьячковская Анна Андреевна, Семенова Галина Моисеевна, Константинова Екатерина Владимировна сиэл, кыл оҥоһуктарга бэйэлэрин сатабылларын ыалдьыттарга үөрэттилэр.

Бүгүҥҥү күнү өр сылларга общепит салаатыгар үлэлээбит, Россия потребительскай кооперациятын туйгуна, Саха Республикатын үлэтин бочуоттаах бэтэрээнэ, «Амтан» куруһуок салайааччыта Елена Гаврильевна Шеломова «Арчы дьиэтигэр» ыыппыт маастар-кылааһыгар куурусса кынатын духовкаҕа буһаран уонна салаат астаан көрдөрдө уонна кэлбит ыалдьыттары күндүлээтэ.

Маны таһынан бүгүҥҥү дьаһалга кэлбит ыалдьыттар баҕа өттүнэн анал байыаннай дьайыы кыттыылаахтарыгар «Санаа күүһэ» көмө акцияҕа кытыннылар.