2026 сыл, олунньу 13 күнүгэр, Болтоҥо нэһилиэгин дьоро түһүлгэтигэр улуустааҕы оҕолорго, ыччакка анаммыт «УРАН ТЫЛ» тыл этиитин, уус-уран ааҕыы күрэҕэ үгэскэ кубулуйбут, өссө кэҥээн-үүнэн, сүрдээх тэрээһиннээхтик буолан ааста. Бу күрэх Арассыыйаҕа Норуоттар Сомоҕолоһууларын, Саха Өрөспүүбүлүкэтигэр Култуура, Чурапчы улууһугар “Олохтоох бэйэ оҥорон таһаарыы”, Болтоҥо нэһилиэгэр “Өбүгэ ситимэ” сылларын көрсө тэрилиннэ.
Ону таһынан, Саха АССР доруобуйа харыстабылын наркома Николай Дмитриевич Кривошапкин – Уот Субуруускай 130 сааһын, этнограф, фольклорист, краевед, учуутал А.А. Саввин 130 сааһын, поэт, прозаик, драматург, краевед, олоҥхоһут, СССР суруйааччыларын Союһун чилиэнэ Михаил Федосеевич Догордуров 120 сааһын, Саха АССР норуотун хаһаайыстыбатын үтүөлээх үлэһитэ Василий Михайлович Кладкин 95 сааһын, Аҕа дойду Улуу сэриитин кыттыылааҕа, биллиилээх снайпер, икки “Кыһыл Знамя” орденнар, “За Отвагу” мэтээл хаһаайына Георгий Константинович Федоров 110 сааһын үбүлүөйдээх сылларыгар анаммыт буолан, тэрээһин суолтата өссө үрдээтэ.
«Уран тыл» күрэх төрөөбүт тылбыт баайын-көрүҥүн, этигэн күүһүн ыччакка тиэрдэр, айар талааннары арыйар сыаллаах. Оҕолор уонна ыччат тылларын сатаан тутталларын, уус-уран айымньыны өйдөөн-дьүүллээн ааҕалларын ситиһиигэ улахан көмөнү оҥорор.
Бу күрэххэ Чурапчы нэһилиэгиттэн И.И. Кандинскай аатынан «Айыллаан» култуура киинин айар үлэ жанрдарыгар исписэлииһэ Урсууна Степановна Саргын ситиһиилээхтик кыттан, дьүүллүүр сүбэ үрдүк сыанабылын ылан, I Үрдэл уонна саамай үрдүк наҕарааданы – «Кылаан кыайыылаах» аатын ылары ситистэ. Урсууна Степановна кэрэ куолаһынан, дириҥник иһирэх тылынан дьону сөхтөрдө, сүрэхтэрин долгутта.
Кинини бу күрэххэ былырыыҥҥы "Уран тыл" кыайыылааҕа, талааннаах ыччат Петр Петрович Дьяконов бэлэмнээбитэ. Онон, айар талаан уонна уопут көлүөнэттэн көлүөнэҕэ бэриллэн иһэрэ бу үбүлүөйдээх сылларга өссө күүскэ этилиннэ.
Бу курдук тэрээһиннэр биһиги төрөөбүт тылбыт уйгутун, култуурабыт баайын харыстыырга, сайыннарарга уонна кэлэр ыччакка тиэрдэргэ улахан суолталаахтар. Урсууна Степановнаны уонна кинини бэлэмнээбит Петр Петрович Дьяконовы эҕэрдэлиибит, инникитин да айар үлэҕитигэр ситиһиилэри баҕарабыт!
Уран тылбыт өрүү чэчирии чэлгийдин!
И.И.Кандинскай аатынан "Айыллаан" култуура киинэ.
